LAWKI LAI PUPA TE KIAL PULPI TUNG

Lawki lai in, pupa te in, (tuikangpi) a na gal kai zaw vun, gam huai sia, gam sim tham, gamtu mang lai sung pi khat ah, a na ki phual vun, khua a na sat dap vua, khum mi mun ah, zomi sau,taw mi, leh sa hang, sa gilo a tuam tuam tam pi khat a na om in, a zau huai gam kuam pi khat a na hi hi. khum mi mun ah vang a hi leh, nek ding dawn ding om lo in, gil kial dangta in, a na ki phual dap vua, sing ga nam tuam tuam leh, na tang dawl, ai gai, ai tuai, tumlai,thangdawn, guatuai leh hakai te an in a na nei vun, khat vei vei sa leh nga man in, khum dan in gilpi a ding sui in, a na om vu hi. tam bang teng a na thuak zieh vun, (khai ci) mu ci hei sung ah, ih nga thei ding vuai ciin, a na ki kum kum vun, pasal ni in, (khaici) sui ding in, ni tum na lam zuan in, teipi nam sau leh thalpi tawi in, vai a kuan dawh ta gel hi. ni tum na lam ma naw in a pei pei gel leh, a ni (2) ni in, khua khat a gal mu gel a, tam mi khua te in, lo nei lo in om lo ding hi, a lo vuah pei dap vai in, khai ci khawp ding, la dap vai, ciin vai a hawm ta gel hi. lo a sui dap kawi kawi gel leh, a mu gel a, lo buk sung ah, a lut gel leh, koi ma om lo in, beem sung ah, (bu hum) ki kawi a mu gel a, khai ci cing khawp ding khat, a la gel a, a ki le kia ta gel hi. inn a tun kia zaw gel in, lo lho pai vun, khum mi khai ci a cing vua, a kum kia in, tangtha tung in, a na ki naam ta thei dawh ta vu hi. khum bang teng tawh hing nuam sa tou tou vun, lawki ngai na tawn dan teng, a na mang ngil pian pian kia vun, ki thawi na a na nei let zel vuh, phuisam ding ciang leh kithawi ding ciang a, sa a na gaw let na vuh, (gangaw) na mun ah, sa that nawn lo in, lawki pupa ngai na, dawibia phuisam ding leh gan gaw, sa gaw ding, mang ngil vun, a na om vu leh, a lo vuah, khai ci, an kung te si in, a na kial kia vua, a ta te zo sia vuh, gil kial in a na si sieng dawh ta vua, a khua gei vuah, han mual, si mual khat a na bawl vun, khum mi mun ah a na vui ta vu hi. khum mi a ta te vuh a na vui na mun vu pen, (TAHAN) a na ci vun, gan a na gaw na vuh, sa a na gaw na mun vu pen,(GANGAW) a na ci vun, tu dawng ciang in, (GANGAW khua) a na ki ci den in, a ta te a vui na vuh, TAHAN zong tudawng ciang in (TAHAN khua) ma a kici na lai hi.