JACKSONVILLE KHUA UZO KI HUAI KI PAWL NA THU MEI LET BYLAW

THUMASA, THUKOT HONNA
Kum siel a, jacksonville UZO makai ding teng leh mipi te lung ki tuah dieldiel tah a, sii na da na tung a, ki huai ki pawl zaw na ding in jacksonville UZO by-law kibawl a hi hi.

KIP SAH NA
Tammi jacksonville UZO sii na man na chieng a, ki huai na ding thu meilet by-law piding pen 01/27/2012 ni, ni tah nai (6) pm hun leh ni in, Pa Hang Khup Sing te inn ah ki kip sah a, a ki kip sah mabang in thu mei let by-law pi a nei a bang in khenpi(7) in ki nei hi.

THU MEI LET BYLAW
(1)Kumsiel makai telding
(1)Lha siel sum donna
(3)Sii na tung ah ki huai na
(4)Nu leh Pa,Laizom leh mou sii te tung ah sii galna
(5)Om pi kawlgam mi si tung ah gal na
(6)ZOtu ZOta mi tha te kung ah thei sah na
(7)Thu mei let by-law khel hun ding
(8)Thu khum na

THU LHUN KHENPI (1) MAKAI TELNA
Jacksonville UZO ki huai kipawl na makai ding pen kumsiel in ki tel na om ding a, ki tel na ni leh hun ding pen, kum bei December lha sung hi ding hi.

THU LHUN KHENPI (2) LHA SIEL SUM DONNA
(A)Jacksonville UZO ki huai kipawl na sung ah inn khat in,lhasiel in dangka $10 ta khie lo pel maw ding a,kum khat chieng in dangka $120 ta khie ciet ding hi.

(B)Inn khat a hilo mi khat tang te in zong lha khat in dangka $10 ta khie ding a, kum khat in dangka $120 ta khia ding hi.

(C)A tun zaw kum khat kum ni a phasa ZOTU ZOTA a hi tam jacksonville UZO ki huai kipawl na sung aa lut a ki hal nai lo mi khat in,mai lam hun ah lutnop na leh ki halnop na ang nei khah tah leh lha siel sum don a kipat ni pan in kisim tou ding a, ang lut ni chieng in a lha pha zaza sum khia ding hi.

(D)Lha siel sum donna tung ah maw puah bang lo mi khat in,mailam hun ah nasep khawlna leh vaidang tuamtuam tawh mundang khua dang ei lal san khah tah leh jacksonville UZO min tawh kikhawl pi ding a, a sum khieh sa teng pen a nua sie khopi te a hu na in ki chiem te ding hi.

(E)Tami jacksonville UZO kihuai kipawl na lhasiel sum donna pen dangka $3000 a ki nga zaw chieng in dangka ki dong nawn lo in ki khawl ta ding hi.

THU LHUN KHENPI (3)
(A)SII NA TUNG AH KI HUAI NA
Jacksonville UZO kihuai kipawlna sung a ang ki hal mi khat in,mailam hun ah dei lo na pi a, sii na dana maan na ang tuah khah tah leh a tuah nu a tuah pa tung ah inn khat in,galna sum dangka $200 ta pie ding hi.

(B)Jacksonville UZO kihuai kipawlna sung a sii na maan na tuah te tung a, galna sum dangka $200 pieh ding te tam a nei a bang in ki zang in, ki pie ding hi, Jacksonville UZO kihuai kipawlna sung a kikup meeting thu khensat thu suh thu tou sumdon paidon vai hawm na zo sie tung ah, gen baang lo a zui bukim ding den te tung beh ah, galna sum dangka $200 ki zang ding hi.

(C)Jacksonville UZO kihuai kipawlna sung ah kihal zo na pi in, ki kup meeting thu khensat thu suh thu tou sumdon paidona tung ah, a kigen za a ki gen bang a, a kim a zui nuam lo a pie nuam lo pa leh pie nuam lo nu tung ah, galna sum $200 pen kizang lo ki pie loding hi.

(D)Jacksonville UZO kihuai kipawlna sung a ki hal innkhat in,sii na dana maan na tuah in,thu lhun pi dungzui a, galna sum dangka $200 a ki pieh zaw cieng a, na sep khawl na leh thu tuam vai tuam tawh, mun dang khua dang ei lal san khah tah leh,a nua sie jacksonville UZO kihuai kipawlna sung ah bang ma leei bat nei lo ding hi.

THU LHUN KHENPI (4) NU LEH PA LAIZOM LEH MOU SII TE TUNG AH KI HUAI NA
(A)Jacksonville UZO kihuai kipawlna sung a ang ki hal mi khat ih nu leh pa laizom leh mou khat penpen in tammi USA gam sung mun khat penpen a up maw lopi a, sii na maan na ang tuah khah tah leh, a tuah nu a tuah pa tung ah inn khat in, galna sum dangka $25 ta tawh gal na nei ciet ding hi.

(B)Jacksonville UZO kihuai kipawlna sung a ki hal hina pi in, THU LHUN Khenpi(3)(C) na sung a, ih gensa ma bang a kikup meeting thu khensat leh thu suh thu tou sumdon paidonna tung ah pie nuam lo nu leh pie nuam nuam lo pa tung ah galna sum dangka$25 kizang lo ki pie lo ding hi.

THU LHUNPI (5) NA, OMPI KAWLGAM MI A SII KHAT TUNG AH GALNA
(A)Minam khat a hi ta zong in, kipawl na khat a hi ta zong in, pawlpi church khat a hi ta zong in, ei ma guah beh in ih thei hilo in, minam khat ih hi na leh ih kipawlna min mi ten ei thei pi na ding in, tual sung khat khua khat a ih ompi kawlgam mi khat in dei lopi a, sii na ang tuah khah tah leh Jacksonville UZO kihuai kipawlna min tawh, sum dangka $50 tawh galna ki nei ding hi.

THU LHUN KHENPI (6)NA, ZOTU ZOTA MI THA TE KUNG AH THEI SAH NA
Jacksonville ah mai lam hun chieng in ZOTU ZOTA mi tha ang tung a om khak leh makai teng ki thuzah ding ua angtung mi tha te va khut sa ding vuh hi, USA ah ZO kipawlna UZO a om lam thei sah in tua chieng in jacksonville UZO kihuai kipawlna te leh thu meilet by-law tengzong theisah pai ding vu hi.

THU LHUN KHENPI (7) NA, THU MEI LET BYLAW
(A)Jacksonville UZO kihuai kipawl na sung a zui ding a kibawl thu mei let by-law khenpi(7) teng sung ah, a ki tang sap na te a hi ta zong in, a khah lua a om khah na te a hi ta zong in, kum cin makai ki tel ni beh in ki la khia thei ki be lap thei beh ding hi.

(B)Jacksonville UZO kihuai kipawlna sung a zah ding a ki bawl thu mei let by-law pi teng pen dei lo na a hi ta zong in, lungkim lo na a hi tazong in Jacksonville UZO kihuai kipawlna sung a, kihuai nuam lou kipawl nuam lou a, kei leh kei USA UZO zungpi tawh ki zop ta vang a ci a om khah leh USA UZO zungpi tawh ki zop thei ding hi.

THU KHUP NA
Jacksonville UZO kihuai kipawlna sung a thu mei let by-law a kibawl na thu in a hi leh tupna leh nim na bulpi pen in (1)lung ki tuah dildiel tah a ZO leh ZOGAM min tawh na sep ton thei na ding (2)A zawng a hau leh mipil mimaw ki dei dat lo na ding (3)Nop na da na tung ah ki huai zawh na ding zong a hi hi. ko jacksonville UZO u pa te in pil lo siem lo pi pi a, jacksonville UZO kihuai kipawl na thu lhun thu mei let leh by-law kang bawl na te tung vuah, ki tang cin la na leh gen khiel at khiel ka nei khah vu leh, Jacksonville UZO member a neu pen pan a gol pen dong chieng kung ah ngai dam na thu kang ngen uh hi. ih biah PASIEN in ZO suan ta te leh ZOGAM khan tou thei na ding thupha ei pie ta hen...Amen

Jacksonville khua makai --- PA. THANG DO DAL ______________

Lai at pipa---------------- PA. KHUP LIAN MUNG ______________

Sum kem pipa--------------- PA. HANG KHUP SING ______________

Sum kem hu pipa------------ PA. MANG LAMH KHAI ______________

Thu dawh pipa-------------- PA. LANG CIN KAP _______________